Este xoves saiu a licitación para a construción do edificio da Escola de Enxeñaría Aeronáutica e do Espazo do campus de Ourense. O importe do contrato ascende a algo máis de dez millóns de euros (con impostos), financiados pola Universidade de Vigo e a Consellería de Educación, Ciencia, Universidades e FP da Xunta de Galicia. A licitación, dispoñible na Plataforma de Contratación do Sector Público, é a segunda que se realiza para construír este edificio, xa que a anterior, que ascendía a 8,3 millóns de euros con impostos, quedou deserta o pasado ano. Nesta ocasión, o importe do contrato ascende a 10.043.000,01 euros, incluíndo impostos, sendo o valor estimado do contrato e o importe sen impostos de 9.130.000,01 euros. O prazo de presentación de ofertas está aberto ata o 11 de abril 2025, ás 23.59 h. Os criterios de adxudicación serán a oferta económica (55%) e a calidade da execución (45%).
"Estamos moi ilusionados con unha infraestrutura que, en primeiro lugar, vai a pór en valor unha escola que xa é moi atractiva para o talento e que vai permitir realizar mellor as tarefas fundamentais da docencia, a investigación e a transferencia, ademáis de dotar de maior visibilidade ás titulacións", asegura o reitor da UVigo, Manuel Reigosa. Coa vista xa posta no futuro, Reigosa sinala ademais que "unha vez construido o edificio, poderemos acometer unha profunda reordenación do campus, tendo en conta a posta en marcha da Escola de Enfermaría, e aquelas novas titulacións que se poidan implantar no novo mapa".
Este venres o campus de Ourense recibiu a visita de Eladio Santos, subdelegado do Goberno en Ourense. O responsable institucional reuniuse con Francisco Javier Rodríguez, vicerreitor do campus de Ourense, e visitou diferentes grupos de investigación nos que puido coñecer de primeira man proxectos que neles se realizan con financiamento estatal.
Na Facultade de Ciencias, Gil Garrote, Beatriz Gullón e María Dolores Torres explicaron na vista diferentes liñas de investigación que desenvolven os grupos de investigación Biorrefinaría e Valorización de Biomasa (Bio2Val) e EQ-2. Entre eles citaron os centrados en dar unha segunda vida a restos de biomasa vexetal para obter diversos compostos de valor engadido (biocarburantes, ingredientes para a industria alimentaria, etc). Xa na Escola de Enxeñaría Aeronáutica e do Espazo, Higinio González, catedrático coordinador do grupo de investigación Aerolab (Aerospace & Transportation Systems Laboratory) e membro do Instituto de Física e Ciencias Aeroespaciais da UVigo, expuxo pola súa banda liñas de investigación arredor da aplicación de aeronaves non tripuladas, drons, a diferentes sectores, como o agrícola e o de transportes. Igualmente explicou proxectos que levan a cabo no eido de aplicación de novas tecnoloxías no mantemento de liñas ferroviarias.
A Fundación Enaire é unha institución cultural dependente do Ministerio de Transportes y Movilidad Sostenible, que desde hai tres décadas desenvolve un amplo programa de actividades centradas na arte e a cultura aeronáutica e que na noite deste luns celebraba en Madrid o seu 30 aniversario, nun acto no que fixo entrega dos premios Aeronáuticos 2024. Presidido polo rei Filipe VI e o ministro de Transporte y Mobildad Sostenible, Óscar Puente, neste acto recoñeceuse co Premio Espacio á investigación sobre a eliminación de refugallo espacial realizada polos expertos do grupo Aerolab Manuel Sanjurjo Rivo, Higinio González Jorge e Luis Miguel González de Santos.
“O premio é un recoñecemento ao esforzo que estamos facendo desde o grupo Aerolab e desde o Instituto de Física e Ciencias Aeroespaciais (IFCAE) por impulsar proxectos de investigación no ámbito da navegación espacial autónoma”, salienta o catedrático Higinio González, docente da Escola de Enxeñaría Aeronáutica e do Espazo do campus de Ourense. Publicada na revista IEEE Transactions on Aerospace, o estudo premiado, titulado Estimación de la Posición y Orientación de Objetos Espaciales mediante Inteligencia Artificial a partir de Mediciones LiDAR en Operaciones de Eliminación Activa de Desechos, forma parte da teses de doutoramento de Enrique Aldao, así como da colaboración dos investigadores da UVigo co profesor Manuel Sanjurjo, da Universidad Carlos III de Madrid. “O traballo céntrase na aplicación de tecnoloxía LiDAR nas operacións de redezvous espacial”, consistentes no acoplamento entre diferentes módulos e naves espaciais explica González, e nel participou tamén Luis Miguel González de Santos, quen realizou o seu doutoramento na UVigo.
Optimas, proxecto europeo no que colabora a Universidade de Vigo, e liderado por monodon de Navantia, iniciou a súa andaina co obxectivo de desenvolver un sistema avanzado de comunicacións ópticas en espazo libre para aplicacións de defensa multidominio. Trátase dun ambicioso proxecto que busca proporcionar comunicacións de transferencia de datos de alta velocidade cun nivel de seguridade excepcional, integrando tecnoloxías de cifrado de última xeración, como a distribución de claves cuánticas (QKD).
Optimas marcará un fito no desenvolvemento de sistemas de comunicación láser aerotransportados, proporcionando comunicacións seguras e de alta velocidade. Está deseñado para operar en constelacións de satélites con aplicacións para unidades espaciais, aéreas (drons), navais e terrestres.
A Escola de Enxeñaría Aeronáutica e do Espazo do campus de Ourense arrancou este mércores pola tarde a programación do seu ciclo de conferencia divulgativas Foro Aero cunha sesión sobre os retos de futuro da industria de UAS (drons). A conferencia correu a cargo de Rafael Márquez Jiménez, director de desenvolvemento de negocio de Aertec.
Aertec, lembrouse no acto, é unha empresa de enxeñaría e consultaría internacional especializada en aeronáutica, nada en 1997 e que hoxe desenvolve a súa actividade en aeroportos, na industria aeroespacial e en defensa. É provedor preferente de Airbus en servizos de enxeñería de fabricación e xestión de programas para os seus avións civís e militares. Na súa traxectoria destaca tamén a súa participación en grandes programas aeronáuticos mundiais, como o A400M, A330MRTT, A350XWB, A320 e o Beluga, entre outros. O seu persoal confórmao un equipo de 600 profesionais especialistas en aeronáutica e dispón de oficinas en España, Reino Unido, Alemaña, Francia, Colombia, Perú, Estados Unidos e Emiratos Árabes Unidos. “Aertec acaba de aterrar en Galicia impulsando un ambicioso plan de crecemento en tecnoloxía aeronáutica no campo dos sistemas de guiado e os avións remotamente tripulados (UAS), que busca chegar a ser un referente europeo en sistemas aeroespaciais, mentres fortalece á rexión no sector”, sinalan desde a organización do Foro Aero.
A Universidade de Vigo e a Consellería de Educación, Ciencia, Universidades e FP asinaron este xoves en Ourense dous convenios de colaboración. A través deles, a Xunta de Galicia destinará 6,36 millóns de euros para desenvolver o Campus Auga, o proxecto de especialización do campus de Ourense, e construír un novo edificio para a súa Escola de Enxeñaría Aeronáutica e do Espazo. Estes acordos elevan a 21 millóns de euros o investimento feito ata agora no campus de Ourense para avanzar na súa estratexia de crecemento arredor destes eidos.
A sinatura, que tivo lugar no edificio Campus Auga do campus de Ourense, correu a cargo de Manuel Reigosa, reitor da Universidade de Vigo, e Román Rodríguez, conselleiro de Educación, Ciencia, Universidades e Formación Profesional da Xunta de Galicia, contando ademais coa asistencia, entre outros, do secretario xeral de Universidades, Alberto Díaz; a subdirectora xeral de Promoción Científica e Tecnolóxica, Irene Bonome; dos vicerreitores da UVigo e da súa secretaria xeral Francisco Javier Rodríguez, Belén Rubio e María José Bravo, respectivamente, e do director do Campus Auga, Roberto Ignacio Fernández.
Este mércores e xoves o campus de Ourense abre as súas portas ao alumnado preuniversitario coa celebración da xornada Coñece o campus de Ourense. Nela, arredor de 900 rapazas e rapaces (450 cada un dos días) de Bacharelato de centros educativos da provincia e a súa contorna teñen a oportunidade de coñecer de primeira man as súas instalacións e as titulacións que nel se ofrecen.
A actividade, que dá continuidade a outras similares celebradas o pasado ano, está organizada pola Vicerreitoría do Campus de Ourense co apoio da Vicerreitoría de Estudantado e Empregabilidade da Universidade de Vigo. A programación arrancou este mércores cunha benvida conxunta no edificio Politécnico. Nela, Francisco Javier Rodríguez, vicerreitor do campus de Ourense, agradeceu ao alumnado, profesorado e centros educativos asistentes o esforzo de achegarse a coñecer este campus.
Despois das vacacións de Nadal, este mércores o campus de Ourense retomou a súa actividade e fíxoo, entre outras cousas, coa celebración da primeira sesión deste 2025 do seu Consello de Campus. Entre os temas abordados tiveron un protagonismo destacado a nova licitación para construír o edificio para a Escola de Enxeñaría Aeronáutica e do Espazo, que se agarda facer neste comezo de ano; a “exitosa” execución do primeiro ano de acreditación do Campus Auga e os resultados de investigación da Universidade de Vigo.
A sesión arrancou cun informe de Manuel Reigosa, reitor da Universidade de Vigo, no que fixo un repaso dos principais temas de interese da institución académica desde a última xuntanza do Consello de Campus de Ourense. Entre eles destacou a citada licitación para a construción dun novo edificio no campus de Ourense, o destinado á Escola de Enxeñaría Aeronáutica e do Espazo. A primeira licitación realizada pola UVigo, cun custo total con IVE previsto de arredor de 8,3 millóns de euros, quedou deserta o pasado ano. Actualmente, sinalou o reitor, “estamos rematando as solucións para licitalo, cun custo máis axustado, a finais deste mes de xaneiro ou febreiro, de xeito que se poida executar a obra este ano”. A nova licitación agárdase que ascenda a arredor de 10,3 millóns de euros, procedentes nun 60% do convenio de novas infraestruturas da Xunta de Galicia e nun 40% de fondos propios da UVigo que xa están reflectidos nos orzamentos deste ano.
462 estudantes da UVigo, 239 do campus de Vigo, 123 do de Ourense e 100 de Pontevedra, cursarán parte ou a totalidade deste curso 2024-2025 nunha universidade estranxeira. A través de programas como Erasmus, ISEP, GE4 ou de bolsas propias da Universidade de Vigo, 275 mulleres, 183 homes e catro persoas que non se identifican cos xéneros anteriormente citados, decidiron abandonar as aulas dos campus de Ourense, Pontevedra e Vigo e continuar os seus estudos en universidades de países tan diversos como Corea, Letonia, Turquía, Colombia, Alemaña, México, EE.UU, Romanía ou Arxentina.
A maioría do alumnado, que contou co asesoramento da Oficina de Relacións Internacionais da UVigo para marchar ao estranxeiro, fíxoo a través do programa Erasmus, 434 (256 mulleres, 174 homes e 4 sen xénero determinado); outros 20 con bolsas propias ou accións como a KA131; seis con ISEP e outros dous con GE4. Os e as beneficiarias de bolsas propias son 13 mulleres e sete homes, dos que 15 son do campus de Vigo, tres de Ourense e dous de Pontevedra. Neste caso, a Facultade de Ciencias do Mar do campus de Vigo é o centro que máis alumnado enviou con esta acción que ten como destinos Colombia, Arxentina, Chile, China, Corea, México e Uruguai. No caso do ISEP, dos seis participantes que viaxan a EEUU, cinco son mulleres e un, home, e por campus, catro son do de Ourense e dous de Vigo. Co GE4 dous estudantes viaxaron a Alemaña, unha alumna e un alumno, ambos estudantes da EEI do campus vigués.