Co curso académico enfilando a súa recta final, é tempo de comezar os actos de graduación académica. En total, nas vindeiras semanas arredor de 739 estudantes das diferentes escolas e facultades do campus de Ourense celebrarán o remate dos seus estudos. Elas e eles recollerán de mans de autoridades académicas e acompañados de membros da comunidade universitaria, familiares, amizades e autoridades os seus diplomas e bandas.
Os primeiros en celebrar a súa graduación serán as e os estudantes da Facultade de Ciencias Empresariais e Turismo. Será este venres, 23 de maio, ás 18.00 horas, no salón de actos Marie Curie do edificio Politécnico nun acto presidido polo reitor da Universidade de Vigo, Manuel Reigosa. Concretamente graduaranse 85 rapaces e rapazas: 49 da XV promoción do Grao en Administración e Dirección de Empresas (ADE); 15 da XIV promoción de Turismo; 17 da VII promoción do programa conxunto dos graos de ADE-Dereito, e 4 da IV promoción do programa conxunto Turismo-Xeografía e Historia. A madriña académica de Turismo e Turismo-Xeografía e Historia será Mª Montserrat Cruz e a Institucional Alejandra Seara, xerente do Consorcio Turismo Ribeira Sacra. En ADE e ADE-Dereito o padriño académico será Jesús Vázquez e o institucional Jorge Vázquez, presidente Redegal. Ademais, subirán a coller o seu diploma os cinco estudantes que conforman a segunda promoción do Título Propio para o Emprego e Vida Autónoma do campus, que terán como madriña a Vanessa Suárez. Por último, no acto farase un recoñecemento ás alumnas de ADE e Turismo que acadaron premios extraordinarios o pasado curso.
Desde xuño de 2023, 15 socios de oito países, entre eles a Universidade de Vigo, levan a cabo con financiamento europeo o proxecto Saril. O seu obxectivo é mellorar a sostibilidade e a resiliencia das redes de infraestruturas e loxística da UE, desenvolvendo metodoloxías e ferramentas de xestión fronte a eventos disruptivos, como poden ser incendios ou ciberataques. Esta semana, os seus membros reúnense no campus de Ourense para facer balance do traballo feito e planificar o último ano de proxecto.
O obxectivo desta xuntanza é, explicaron os seus responsables, “avaliar o estado global do proxecto, compartir os traballos da fase de simulacións obtidos das ferramentas desenvolvidas e comezar a traballar no período de validación que lideramos dende a UVigo". A programación arrancou este martes na Biblioteca Rosalía de Castro do campus coa participación dunha trintena de persoas en representación dos 15 socios da iniciativa, desde universidades e centros de investigación a grandes empresas. Francisco Javier Rodríguez, vicerreitor do campus de Ourense, foi o encargado de darlles a benvida, destacando nas súas palabras o enriquecemento académico que supón o desenvolvemento deste tipo de proxectos pero tamén pondo en valor o impacto social que teñen, neste caso no eido da sostibilidade e resiliencia das infraestruturas.
As vagas de calor serán moito máis intensas e de maior extensión espacial na península ibérica e Baleares para o período 2050-2095. Pola contra, no caso das ondas de frío, tanto a súa intensidade como extensión espacial diminuirán. Estas son dúas das proxeccións feitas nun estudo conxunto realizado por un equipo investigador da Universidade de Vigo, a Universidade de Santiago de Compostela e a Misión Biolóxica de Galicia do Consello Superior de Investigacións Científicas (CSIC).
O estudo acaba de ser publicado co título Heat and cold wave intensity and spatial extent on the Iberian Peninsula: future climate projections (2050–2095) na revista Climate Dynamics e está asinado por Nieves Lorenzo, investigadora do Environmental Physics Laboratory (EphysLab), CIM-UVigo; Alejandro Díaz e Alberto Martí (USC), e Dominic Royé (Misión Biolóxica de Galicia). O traballo é a continuación das análises de intensidade e extensión espacial das ondas de calor e de frío no ámbito da península ibérica e Baleares realizadas anteriormente por membros do equipo.
A Universidade de Vigo participará en cinco novos proxectos para desenvolver tecnoloxías innovadoras no ámbito aeroespacial e farao da man de empresas de relevancia internacional que lle achegarán á institución preto de 1,5 millóns de euros. Estas novas iniciativas desenvolveranse no marco do Programa Tecnolóxico Espacial (PTE), promovido polo Ministerio de Ciencia, Innovación e Universidades a través do Centro para el Desarrollo Tecnológico y la Innovación (CDTI). Esta convocatoria está dirixida a consorcios de empresas que contraten organismos de investigación como forma de potenciar a transferencia de coñecemento entre os distintos actores da innovación tecnolóxica no eido espacial.
Os grupos de investigación da UVigo, tanto do campus de Ourense como do de Vigo, colaborarán con compañías como Airbus, Indra Sistemas, GMV Aerospace and Defence ou a galega Alén Space, spin-off que naceu precisamente na propia Universidade de Vigo. En total asinaranse oito contratos con sete empresas, que suporán a captación de 1.490.000 euros para impulsar o desenvolvemento tecnolóxico no campo do espazo en dúas frontes: as constelacións de satélites e a maduración “bottom-up” da tecnoloxía espacial.
Un equipo de investigadores das universidades de Vigo e de Santiago de Compostela desenvolveron un modelo matemático e un software que predín a expansión da avespa velutina e que permiten analizar distintas estratexias de control desta especie invasora.
Os resultados do seu traballo acaban de ser publicados na revista internacional Nonlinear Analysis: Real World Applications nun artigo titulado Application of Stieltjes parabolic partial differential equations to the population dynamics of vespa velutina. Está asinado polos profesores Iván Area, membro do Instituto de Física e Ciencias Aeroespaciais e da Escola de Enxeñaría Aeronáutica e do Espazo da Universidade de Vigo; e por Francisco J. Fernández, Juan J. Nieto e Adrián F. Tojo, do Centro de Investigación e Tecnoloxía Matemática de Galicia e da Universidade de Santiago de Compostela.
A Escola de Enxeñaría Aeronáutica e do Espazo do campus de Ourense celebrou este venres o Día Internacional dos Voos Espaciais Tripulados e o Día da Cosmonáutica. Fíxoo cunha programación que incluíu a segunda edición do seu Foro Alumni e a entrega de premios do seu concurso AeroVisión2025.
No II Foro Alumni, o estudantado do Grao de Enxeñaría Aeroespacial da UVigo tivo a oportunidade de coñecer de primeira man os camiños profesionais que tomaron cinco egresadas e egresados desta escola. Concretamente, participaron Raúl Quibén, enxeñeiro aeronáutico e estudante predoutoral da Universidad Carlos III; Gema González-Redondo, responsable de produción en Aciturri Aeronáutica; Pablo Domínguez, enxeñeiro de deseño para Airbus Helicopters; Ana Cambón, enxeñeira de procesamento de datos en Eumetsat, e Paula Salomón, responsable de planificación e coordinación en Utingal. Coa súa elección, o centro quixo dar visibilidade a diferentes perfís profesionais en diferentes sectores.
Este luns e martes arredor de 600 estudantes preuniversitarios de nove centros educativos galegos participan na xornada Coñece o campus de Ourense. Nela teñen a oportunidade de, ao longo dunha mañá, facer “vida universitaria”, coñecendo de primeira man os seus centros e instalacións e as titulacións que neles se imparten. A actividade dá continuidade a outra similar celebrada a mediados de xaneiro e nas que estiveron outros 900 alumnos e alumnas de Bacharelato.
A xornada está organizada pola Vicerreitoría do Campus de Ourense co apoio da Vicerreitoría de Estudantado e Empregabilidade da Universidade de Vigo. A súa programación arrancou cunha benvida conxunta no edificio Politécnico e continuou cunha visita guiada ás diferentes escolas e facultades. Na benvida, Francisco Javier Rodríguez, vicerreitor do campus de Ourense, agradeceu ao alumnado, profesorado e centros educativos asistentes a boa acollida que deron a esta iniciativa. Nas súas palabras destacou que estas xornadas non só atraen centros educativos de Ourense senón tamén doutras provincias galegas, pondo en valor o interese que suscita este campus e as súas titulacións alén da súa contorna máis próxima. O vicerreitor animou ao alumnado presente a aproveitar esta actividade para ver e valorar as oportunidades que lles ofrece este campus de cara ao seu futuro académico, subliñando cuestións como os altos índices de empregabilidade das súas carreiras.
A Escola de Enxeñaría Aeronáutica e do Espazo do campus de Ourense celebrou este xoves pola tarde unha nova sesión do seu ciclo de conferencias Foro Aero, que nesta ocasión contou coa colaboración do Exército do Aire e do Espazo e da Subdelegación de Defensa de Ourense. A sesión levou por título Drons: capacidades actuais e desafíos do futuro e foi ofrecida por Juan Manuel Capellín, capitán enxeñeiro do Exército do Aire e do Espazo (Ministerio de Defensa).
“Nestes momentos o crecemento tecnolóxico que se está experimentando nun grande abanico de sectores incrementou a necesidade de enxeñeiros de todo tipo. En particular, para determinadas tecnoloxías os enxeñeiros aeroespaciais, enxeñeiros informáticos e especialistas en Intelixencia Artificial teñen un plus de empregabilidade en grandes empresas, startups e tamén no exército”, sinalan desde a organización do evento. Na actual situación xeopolítica, engaden, a industria española de defensa tamén busca o impulso a programas de investigación e desenvolvemento nas tecnoloxías de defensa con aplicacións duais.
Un equipo da Universidade de Vigo e a empresa Copasa está a desenvolver o proxecto estatal Airis. O seu obxectivo é, aplicando as últimas tecnoloxías, dixitalizar e automatizar a inspección de vías de ferrocarrís de alta velocidade para contribuír a mellorar tanto a súa rendibilidade como a súa seguridade.
O proxecto, titulado Adaptative and intelligent railway inspection system, está financiado cun total de 568.906,62 euros pola convocatoria de colaboración público-privada 2023 da Agencia Estatal de Investigación, do Ministerio de Ciencia, Innovación y Universidades, e fondos da Unión Europea NextGeneration. Nel participa por parte da Universidade de Vigo o grupo de Sistemas Aeroespaciais e de Transporte-Aerolab, con sede na Escola de Enxeñaría Aeronáutica e do Espazo do campus de Ourense e pertencente ao Instituto de Física e Ciencias Aeroespaciais (Ifcae). Coordina a iniciativa por parte da UVigo o profesor e investigador Higinio González. O socio do proxecto, Copasa, Sociedad Anónima de Obras y Servicios, é unha empresa multinacional de construción de orixe ourensá que conta cunha dilatada traxectoria no desenvolvemento de infraestruturas de todo tipo.