O equipo da Universidade de Vigo Aerolab lidera un novo proxecto europeo que durante os vindeiros catro anos traballará para transformar a construción e a rehabilitación de edificios mediante robótica avanzada, automatización e dixitalización. A iniciativa, que conta coa participación de 14 entidades públicas e privadas de oito países, está financiada pola UE con case catro millóns de euros. “Radiance sitúanos na primeira división europea de robótica, traballando con institucións de referencia”, destacan os responsables do proxecto.
Baixo o título Robotic, automated and digital solutions for improving building renovation and new construction efficiency (Radiance), o proxecto ten unha duración de catro anos, arrancando o pasado mes de setembro e prolongándose ata finais de agosto de 2029. Está financiado ao 100%, con 3.999.189,25 euros, polo programa Horizonte Europa, da UE, correspondendo 550.000 euros á UVigo. Está coordinado polo grupo Aerospace and Transportation Systems Laboratory (Aerolab) da Universidade de Vigo, pertencente ao Instituto de Física e Ciencias Aeroespaciais e con sede na Escola de Enxeñaría Aeronáutica e do Espazo do campus de Ourense. O coordinador de Radiance, o profesor da UVigo Higinio González, subliña que “este proxecto supón un fito para Aerolab, para o Ifcae e para o campus de Ourense porque é a primeira vez ha historia do noso campus no que se lidera un proxecto europeo no ámbito da robótica”, indica. O financiamento acadado, engade, permitiralle desenvolver liñas de investigación relacionadas coa robótica aérea.
O Consello de Campus de Ourense celebrou este xoves a súa primeira xuntanza do curso académico 2025/2026. Entre outros temas, nel informouse da posta en marcha dun proceso de consulta para comezar a traballar na reordenación do uso de espazos universitarios que permitirá a apertura do edificio da Escola de Enxeñaría Aeronáutica e do Espazo que se está a construír.
A sesión, que tivo lugar no edificio Xurídico-Empresarial, arrancou cun informe do reitor da Universidade de Vigo, Manuel Reigosa, no que fixo un repaso das novidades en diferentes cuestións que atinxen tanto ao conxunto da Universidade como especificamente ao campus de Ourense. No primeiro caso, falou de temas como as negociacións sobre o mapa de titulacións, apuntando que “aínda que están bastante paradas si que houbo algún achegamento” e tamén das negociacións sobre o plan de financiamento tras a primeira xuntanza e á espera da constitución da súa comisión. No caso do campus de Ourense, o reitor salientou como abre este curso académico “nunha situación moi favorable” cuns datos de matrícula “extraordinarios, por riba do 100%” e coas obras de construción do novo edificio para a Escola de Enxeñaría Aeronáutica e do Espazo en marcha.
Un total de 27 alumnos e alumnas de catro titulacións do campus de Ourense integran Auria Technologies, unha asociación estudantil que leva varios meses traballando no desenvolvemento dun sistema de condución autónoma que nestes días poñen a proba na competición Formula Student do Reino Unido. Esta proba reúne entre o 16 e o 20 de xullo un cento de equipos universitarios de todo o mundo no circuíto internacional de Silverstone. A proba conta con varias modalidades, entre elas Formula Student-Artificial Intelligence, que é na que compite o equipo ourensán e consistente no desenvolvemento, programación e posta a punto dun sistema de condución autónoma que se integra nun vehículo sen piloto proporcionado pola organización.
Trátase, en concreto, dunha modalidade de competición centrada “no desenvolvemento integral do software de intelixencia artificial de control do vehículo, así como na adaptación do hardware necesario para a súa condución autónoma”, sinala Carlos Carballido, team leader de Auria Technologies. “Os equipos deben integrar un sistema de visión artificial, planificación de traxectorias e intelixencia artificial para superar diferentes probas dinámicas e estáticas, sen intervención humana”, engade Carballido. Preto de 30 equipos de diferentes países toman parte nas probas desta categoría da Formula Student, na que os equipos universitarios deben presentar os sistemas de condución desenvolvidos para que o vehículo opere de forma completamente autónoma. “O noso vehículo é 100% eléctrico, equipado con cámaras, sensores LiDAR e un sistema de procesamento baseado en redes neuronais para a toma de decisións en tempo real”, engade o representante desta asociación estudantil.
Cun orzamento de dez millóns de euros, a ansiada construción do edificio da Escola de Enxeñaría Aeronáutica e do Espazo da Universidade de Vigo xa está en marcha. Este venres presentouse o seu proxecto cunha visita de autoridades ao campus de Ourense na que se destacou que, nun contexto de crecemento do sector aeronáutico, a posta en marcha deste edificio é “unha aposta de futuro”.
A presentación do proxecto fíxose no Campus Auga (fronte a parcela na que se construirá) e onde actualmente hai laboratorios da Escola de Enxeñaría Aeronáutica e do Espazo que foron visitados polas autoridades durante o acto. Entre as persoas asistentes estiveron Alfonso Rueda, presidente da Xunta de Galicia; Manuel Reigosa, reitor da Universidade de Vigo; Román Rodríguez, conselleiro de Educación, Ciencia, Universidades e Formación Profesional; Francisco Javier Rodríguez, vicerreitor do campus de Ourense, e unha ampla representación do equipo de goberno da UVigo; Nieves Lorenzo, directora da Escola de Enxeñaría Aeronáutica e do Espazo; Luis Menor, presidente da Deputación de Ourense, e Aníbal Pereira, tenente alcalde do Concello de Ourense.
O equipo de aeromodelismo UVigo Aerotech compite esta semana na XtraChallenge de Valencia. Faino co seu dron Peregrinus, froito dun proxecto multidisciplinar no que participaron ao longo deste curso académico 46 estudantes do campus de Ourense, fundamentalmente da Escola de Enxeñaría Aeronáutica e do Espazo e da Escola Superior de Enxeñaría Informática pero tamén da Facultade de Relacións Internacionais.
A XtraChallenge, que se celebra do 8 ao 11 de xullo, é unha competición española universitaria de aeromodelismo, concretamente de transporte de carga con drons de á fixa, creada en 2022 por estudantes da Universitat Politècnica de València, do equipo Xtra2 UPV. A cita xurdiu co propósito de animar ao alumnado estatal a deseñar, construír e pilotar aeronaves radiocontrol desde unha perspectiva de enxeñaría. O certame está baseado na Air Cargo Challenge e nesta edición conta coa participación de 20 equipos, sendo o da UVigo o único representante galego. “Para nós é un orgullo representar tanto a nosa cidade, Ourense, como a nosa universidade, a Universidade de Vigo, nesta competición”, indican desde UVigo Aerotech.
O pasado ano, a Universidade de Vigo e a Consellería de Medio Ambiente e Cambio Climático da Xunta de Galicia arrancaron unha liña de colaboración co obxectivo último de proporcionar aos municipios galegos unha serie de ferramentas que lles permitan elaborar os seus propios mapas de calor e localizar neles os potenciais refuxios climáticos e illas de calor atendendo á preservación da biodiversidade. Tras a elaboración da metodoloxía por parte do equipo da UVigo, a iniciativa está xa na súa segunda fase co desenvolvemento do dispositivo portátil e da aplicación informática previstos.
Estes avances foron explicados este xoves nunha visita ás zonas verdes do campus de Ourense na que participou Manuel Reigosa, reitor da Universidade de Vigo; Ángeles Vázquez, conselleira de Medio Ambiente e Cambio Climático; Manuel Pardo, delegado territorial da Xunta de Galicia en Ourense; Paula Uría, directora xeral de Enerxías Renovables e Cambio Climático; Francisco Javier Rodríguez, vicerreitor do campus de Ourense; Belén Rubio, vicerreitora de Investigación, Transferencia e Innovación, e Pedro Orgeira, docente e investigador da Escola de Enxeñaría Aeronáutica e do Espazo e do Aerospace Technology Research Group (ATRG)-atlanTTic da UVigo, responsable do proxecto.
A Universidade de Vigo abriu este martes a preinscrición para os seus másteres oficiais para o curso 2025/2026, unha oferta que inclúe 67 títulos: 46 adscritos ao campus de Vigo, 16 ao de Ourense e 12 ao de Pontevedra, e que no seu conxunto supoñen un total de 1756 prazas repartidas en todas as áreas de coñecemento.
Destas 67 propostas, sete son de nova implantación: tres en Vigo, dous en Pontevedra e outros dous en Ourense. No caso de Vigo, estréase un mestrado en Literatura dramática, música e artes escénicas -presencial e con 25 prazas-; outro de Ensino de español como lingua estranxeira ou segunda lingua, interuniversitario, en liña e con oito prazas para cada universidade, e o Máster en Realidade estendida, semipresencial, conxunto coa universidade da Coruña, con 90 créditos e 10 prazas para a UVigo.
O grupo de Sistemas Aeroespaciais e de Transporte (Aerolab) da Universidade de Vigo e a empresa Copasa están a levar a cabo o proxecto estatal Airis. Nel traballan no desenvolvemento de sistemas para a dixitalización da información do mantemento das vías de ferrocarril de alta velocidade. Trátase de, aplicando as últimas tecnoloxías, dixitalizar e automatizar a inspección destas vías e contribuír así a mellorar tanto a súa rendibilidade como a súa seguridade. No marco da súa actividade, este martes o campus acolleu a celebración dunha mesa redonda sobre presente e futuro da dixitalización no mantemento ferroviario.
A xornada de difusión foi presentada por Nieves Lorenzo, directora da Escola de Enxeñaría Aeronáutica e do Espazo da UVigo, e moderada por Santiago García, xerente da Área Territorial Norte-Renfe. Contou coas intervencións de Héctor Arguelles, técnico de enxeñaría de produción de ancho métrico (base de mantemento O Berrón) de Renfe; Juan Manuel Silva, técnico de enxeñaría de produción de alta velocidade (base de mantemento de Redondela) de Renfe; Luis Manuel Díaz, responsable de maquinaria de mantemento ferroviario, de Copasa; e Eduardo Ríos, investigador do grupo Aerolab.
Co nome de Storcito e con case 4,9 millóns de euros de orzamento, este mes de maio arrancou un proxecto europeo liderado pola Universidade de Vigo que afondará na "transformación sostible de comunidades rurais mediante innovacións técnicas, sociais e organizativas". A iniciativa fomentará de xeito multidisciplinar a innovación en ámbitos chave das zonas rurais europeas, como son a prevención de incendios, a mobilidade e a enerxía.
O consorcio de Storcito (Sustainable transformation of rural communities via technical, social and organizational innovations) está formado por once entidades de cinco países europeos, como son Noruega, España, Alemaña, Grecia e Países Baixos. Participan cinco institucións académicas (Universidade de Vigo, Universidade Ruhr de Bochum, Universidade Agrícola de Atenas, Universidade de Utrecht e o Instituto de Tecnoloxía Deggendorf); as entidades de innovación Sintef AS (oenegué dedicada á I+D) e o Instituto Ourensán de Desenvolvemento Económico (Inorde); as empresas de desenvolvemento tecnolóxico Innogando SL (sector gandeiro) e Nimmo AS (mobilidade sostible) e o municipio noruegués de Gjesdal. Cunha duración de tres anos, está financiado con 4.862.797,70 euros a través do programa Horizonte Europa da UE, correspondendo á UVigo 620.625 euros.